37
S 1456

Account of disputes concerning the estate of Snodland, Kent, in the time of Bishop Godwine. A.D. 995 x 1005/6

Archive: Rochester

TEXT

Rochester, Dean and Chapter, Textus Roffensis, fos 155-6v: copy, s. xii¹
Px Rubric: Her cyð on ðysum gewrite hu Godwine biscop on Hrofeceastre . 7 Leofwine Ælfeages sunu wurðon gesybsumode ymbe þæt land æt Snoddinglande . on Cantwarabyrig .
Þa ða se biscop Godwine com to ðam biscopstole þurh hæse his cynehlafordes Æðelredes cynges æfter Ælfstanes forðsiþe biscopes þa gemetæ he on ðam mynstre þa ylcan swutelunga þe his foregenga hæfde . 7 þærmid on þæt land spæc . ongan ða to specenne on ðæt land . 7 elles for Godes ege ne dorste . oððæt seo spræc wearð þam cynge cuð . Þa ða him seo talu cuð wæs . þa sende he gewrit 7 his insegl to þam arcebisceope Ælfrice . 7 bead him þæt he 7 hys þegenas on East Cent . 7 on West Cent . hy onriht gesemdon . be ontale . 7 be oftale . Þa þæt wæs þæt se bisceop Godwine com to Cantwarabyrig to ðam arcebiscope . þa com ðider se scyresman Leofric . 7 mid him Ælfun abbod . 7 þegenas ægþer ge of East Cent ge of West Cent . eal seo duguð . 7 hy ðær þa spæce swa lange handledon . syððon se bisceop his swutelunge ge\e/owod hæfde . oþ hy ealle bædon þone biscop eaðmodlice . þæt he geunnan scolde þæt he moste mid bletsunga þæs landes brucan æt Snoddinglande his dæg . 7 se biscop þa þæs getiðode on ealra þæra witena þanc þe þær gesomnode wæran 7 he behet þæs truwan þæt land æfter his dæge unbesacen eode eft into þære stowe þe hit ut alæned wæs . 7 ageaf þa swutelunga þe he to þam lande hæfde þe ær of þære stowe geutod wæs . 7 þa hagan ealle þe he bewestan þære cyrcan hæfde into þære halgan stowe . 7 þises loces ærendracan wæran . Ælfun abbod 7 Wulfric abbod . 7 Leofric sciresman . 7 Siweard . 7 Wulfstan æt Sealtwuda . 7 Ælfelm Ordelmes sunu . Þonne is her seo gewitnes þe æt þisum loce wæs . þæt is ærest se arcebiscop Ælfric . 7 se biscop Goduuine . 7 Wulfric abbod . 7 Ælfun abbod . 7 Ælfnoð æt Orpedingtune . 7 se hired æt Cristes cyrcan . 7 se hired æt Sancte Augustine . 7 so burhwaru on Cantwarebyrig . 7 Leofric sciresman . 7 Lifing æt Meallingan . 7 Siweard . 7 Sired his broðor . 7 Leostan æt Mærseham . 7 Godwine Wulfeages sunu . 7 Wulstan æt Sealtwuda . 7 Wulfstan iunga . 7 Leoswine æt Dictune . 7 Leofric Ealdredes sunu . 7 Goda Wulfsiges sunu . 7 Ælfelm Ordelmes sunu . 7 Sidewine æt Pealleswyrðe . 7 Wærelm . 7 Æþelred portgerefa on byrig . 7 Guðwold . Gif hwa þis ðence to awendenne . 7 þas foreword to abrecenne . awende him God fram his ansyne on þam miclan dome . swa þæt he si ascyred fram heofena rices myrhðe . 7 sy eallum deoflum betæht into helle . Amen .